Birat Post शुक्रबार, भाद्र ०६, २०७६ मा प्रकाशित

featured photo: Birat Post

विराटनगर: मोरङको कटहरी क्षेत्रमा स्थापना भएका झण्डै ४० वटा उद्योगहरू विद्युत समस्याका कारण बन्द हुने अवस्थामा पुगेका छन् । कटहरी सव–स्टेशनको क्षमता अभिवृद्धिको काम सम्पन्न भैसकेर पनि विद्युतको तार तान्न ग्रामथान गाउँपालिका–५ गिधनियाँका वासिन्दाले नदिएपछि विद्युत क्षमता अभिवृद्धिको काम हुन नसकेर उद्योगी व्यवसायीले समस्या झेल्नु परेको हो ।

वितरण प्रणाली सुदृढीकरण तथा विस्तार आयोजना विराटनगरका प्रमुख सैलेश सापकोटाका अनुसार दुहबी ग्रीडबाट कटहरी सव–स्टेशनसम्मको २० किलोमिटर लामो दुरीबाट प्रशारण लाइन तान्ने र कटहरी सव–स्टेशनको क्षमता अभिबृद्धि गर्नुपर्नेमा सबै काम भैसकेको छ ।

आठ एमभीएको सब–स्टेशन निर्माण भएर त्यसको परीक्षण पनि भैसकेको छ । गिधनियाँमा झण्डै तीन किलोमिटरमा विद्युत पोल गाडेर तार तान्नेबित्तिकै ३३ केभीएको प्रशारण लाइन चालु हुन्छ ।

सो लाइन चालु भैदियो भने कटहरी क्षेत्रका उद्योग र ग्राहस्थ ग्राहकहरू कसैले पनि विद्युतको समस्या झेल्नु पर्दैन । स्थानीय वासिन्दासँग प्राधिकरणले बीसौं पटक छलफल गर्यो र पनि लाइन तान्न दिन स्थानीय वासिन्दा सहमत भएका छैनन् ।

विद्युत प्रशारण लाइन विरूद्ध स्थानीयले संघर्ष समिति नै गठन गरेका छन् । संघर्ष समितिका अध्यक्ष भकुलाल विश्वास कसैको कुरा सुन्ने पक्षमा छैनन् ।

स्थानीय तहबाट गरिएको प्रयास असफल भएपछि विराटनगरका उद्योगी व्यवसायीहरूले १ नम्बर प्रदेश सरकारका मुख्यमन्त्री शेरधन राईलाई गुहार्न पुगेका छन् ।

दुई दिन पहिले मुख्यमन्त्रीसँग भएको भेटमा नेपाल विद्युत प्राधिकरणका कार्यकारी प्रमुख कुलमान घिसिङ र ऊर्जामन्त्री वर्षमान पुनलाई भनेर समस्या समाधान गरिदिन आग्रह गरेका छन् ।

मोरङ व्यापार संघका अध्यक्ष प्रकाश मुन्दडा उद्योगी व्यवसायीको लागि यो गम्भीर समस्या हो भन्दछन् । उद्योग संगठन मोरङको कार्यसमितिका सदस्य विपिन काबरा पनि स्थानीय तहबाट समस्या सुल्झाउन नसकिएकाले माथिल्लै तहले चासो लिएर काम गरे मात्रै समस्या समाधान हुने बताउँछन् । स्थानीय प्रशासनको पहलले पनि समस्या समाधान हुन नसकेकाले माथिल्लो तहस“ग गुहार माग्नु परेको हो ।

पर्याप्त विद्युत भएर पनि वितरण प्रणाली राम्रो नहुँदा यस क्षेत्रको उद्योग व्यवसायमा प्रतिकूल प्रभाव परिरहेकाले प्राधिकरणले तीन वर्ष पहिले १ नम्बर प्रदेशमा विद्युत वितरण सुदृढीकरणको काम थाल्यो ।

जस अन्तर्गत मोरङमा कटहरी, उर्लाबारी र रंगेली, झापामा गौरादह र घैलाडुब्बा, इलाममा पञ्चमी चिसापानी, फिक्कल, तेह्रथुममा आठराईको संक्रान्ति बजार, भोजपुरको प्याउली र रानीवास गरी जम्मा आठ ठाउँमा सब स्टेशनको क्षमता विस्तारको काम थालिएको हो । जम्मा २ अर्बको सो काम ए टु जेड इन्फ्रा इन्जिनियरिङ नामक भारतीय कम्पनीले सो काम गरेको हो ।

आयोजनाको कार्यावधी आगामी भदौ १६ गते (२ सेप्टेम्बर) मा सकिदैछ । आयोजना प्रमुख सापकोटाका अनुसार आगामी पुस (डिसेम्बर) सम्म कार्यावधी थपिने सम्भावना छ ।

स्थानीयको अवरोध नहुने हो भने कटहरी सब स्टेशनको बाँकी काम पनि सकिने छ । तर आयोजनाले आफ्नो तहबाट गरिरहेको प्रयास भने सफल हुन नसकेकाले ‘हात्ती छिर्यो, पुच्छर अड्कियो’ भने जस्तै थोरै कामले बाधा पुगेको हो । अाजकाे उद्घोष दैनिकमा खबर छ ।

सम्बन्धित

ताजा अपडेट
नेपाली कांग्रेसको पदाधिकारी तथा पूर्व पदाधिकारीको बैठक स्थगित
कांग्रेस पार्टी पदाधिकारी तथा पूर्व पदाधिकारीको बैठक देउवा निवास बुढानिलकण्ठमा बस्दै
आदिकवि भानुभक्त आचार्यको २०८औँ जन्मजयन्ती मनाइदै

लोकप्रिय

सम्पर्क

विराटपोष्ट डिजिटल प्रा.लि.

विराटनगर – मोरङ ,नेपाल
कम्पनी दर्ता प्रमाणपत्र नं.:२२७८४३/०७६/०७७
स्थायी लेखा नं.:६०९६५५९५५
सूचना तथा प्रसारण विभाग दर्ता नं:१६६५/०७६/०७७
Email: [email protected] 

 सम्पादक

प्रतिक्षा खतिवडा

संंवाददाता
रोशिका अधिकारी

सञ्चालक तथा प्रबन्धक निर्देशक

कौशल निरौला

बिज्ञापनका लागि :

९८१२३०६६६०

९८१४३८५२१४

०२१ ४२०१०६

विराटपोष्ट  डिजिटल प्रा.लि.

विराटनगर – मोरङ ,नेपाल