featured photo: Birat Post

काठमाडौं२८ जेष्ठ। सर्वोच्च अदालतले ५२ संवैधानिक पदाधिकारीहरू विरुद्धको निर्णय आगामी असार १८ गते सुनाउने भएको छ । आज सुनाउने भनिएको फैसला आगामी असार १८ गतेका लागि सरेको हो ।

वर्तमान प्रधानमन्त्री केपी शर्मा ओली नै देशको नेतृत्वमा छँदा २०७७ माघ २१ मा ३२ जना र २०७८ असार १० गते २० जना गरी ५२ जनालाई अख्तियारसहित विभिन्न संवैधानिक आयोगमा नियुक्त गरिएको थियो । तर ती नियुक्ति संविधानविपरित भन्दै सर्वोच्चमा १५ वटा रिट परेका थिए । तर रिटको सुनुवाइमा ढिलाइ हुँदै आएको थियो ।

साढे ४ वर्षपछि गत माघ ३० गतेदेखि प्रधानन्यायाधीश प्रकाशमानसिंह राउत तथा न्यायाधीशहरू सपना प्रधान मल्ल, मनोजकुमार शर्मा, कुमार चुडाल र नहकुल सुवेदीको इजलासले मुद्दालाई हेर्दाहेर्दैमा राखेर निरन्तर सुनुवाइ गरेपछि बल्ल यो मुद्धाले गति पाएको हो । त्यसअघि यो मुद्दाको सुनुवाइले प्राथमिकता पाएको थिएन । नियुक्तिसम्बन्धी विवादका रिटमा प्रारम्भिक सुनुवाइको पालो नै एक वर्षभन्दा पछि मात्र आएको थियो ।

संवैधानिक इजलासले यही जेठ २ गतेको अन्तिम बहसपछि जेठ २८ गते निर्णय सुनाउने मिति तोकेको थियो । तर, विभिन्न कारणवश आज फैसला नआउने भएको हो ।