featured photo: Birat Post

काठमान्डौं,२३ पुष ।

सत्तारुढ नेकपा (एमाले)का अध्यक्ष केपी शर्मा ओलीले प्रचण्ड नेतृत्वको सरकार ढाल्न देउवा सक्रिय भएको आरोप लगाएका छन् । उनले देउवाको अस्वभाविक सक्रियता बढेको भन्दै आशंका समेत ब्यक्त गरेका छन् । उनले पुस २६ गते सरकारलाई विश्वासको मत दिने दिन समयमै संसदमा उपस्थित हुन पार्टीका सांसदहरुलाई निर्देशन समेत दिएका छन् ।

शनिबारबाट काठमाडौंमा सुरु भएको पार्टीका सांसदहरुको प्रशिक्षण कार्यक्रममा बोल्दै उनले नेपालीहरुको चाहनामानै वर्तमान सरकार बनेको उल्लेख गर्दै त्यसलाई सफल र प्रभावकारी बनाउन आफूले चाहेको बताए ।

उनले भने, ‘पहिलो कुरा त हामी २६ गते प्रधानमन्त्री माथि प्रतिनिधिसभा बहुमतको विश्वास छ भन्ने कुरा हामीले देखाउनु छ । २६ गते सबै साथीहरु कुनै बट, इफ हँुदैन । त्यो एकदमै बुझ्न जरुरी छ । हरेक साथीहरु भनेको समयमा संसदमा कोहीकोही दिन यस्ता हुन्छन, जहाँ एक मिनेट ढिला गर्न हुन्न । २५ गते पहिलो दिन, २६ गते विश्वासको मत दिने यस्ता दिनहरुमा एक मिनेट पनि ढिला हुनुहुन्न । समय भित्रै आउने र विश्वासको मत दिने काम गर्नु पर्छ ।

मैले अघि नै भयो–यो नेपालीहरुले बलजफ्ती बनाएको सरकार हो । यो सरकारलाई हामी सफल सरकार बनाउन चाहन्छौं । यो सरकारलाई हामी उपयुक्त ढंगले गाईड गर्न चाहन्छौं ।’ अध्यक्ष ओलीले यो सरकार ढाल्नका लागि नेपाली काँग्रेसका सभापति शेरबहादुर देउवाले अधिकतम प्रयास गरिरहेको उल्लेख गर्दै सफल हुन नदिने समेत बताए ।