featured photo: Birat Post

नेचा,१५ माघ ।

सोलुखुम्बुमा जीपको हुट हटाउने विषयमा असहमति जनाउँदै यातायात व्यवसायीहरुले जीप सञ्चालन ठप्प पारेका छन् ।

आज काठमाण्डौँसहितका जिल्ला जाने कुनै पनि लामो दूरीका जीप नछुटेको यातायात व्यवसायी दोर्जी शेर्पाले बताए । जीप नछुट्दा यात्रु समस्यामा परेका छन् । जिल्ला ट्राफिक प्रहरी कार्यालय सोलुखुम्बुले केन्द्रीय सर्कुलर अनुसार दुर्घटनाको जोखिम बढेको भन्दै हुट हटाउन ताकेता गरेपछि यातायात व्यवसायीले यस्तो निर्णय गरेका हुन् ।

व्यवसायीहरुले शनिवार यस विषयमा छलफल गरेर आइतबार यातयात सञ्चालन बन्द गरेका हुन् । सोलुखुम्बुबाट छुट्ने जीपले यात्रुका सामान, लगेज, आलु लगायतका सामग्रीहरु बोक्नुपर्ने भएकाले हुट हटाउन नसकिने व्यवसायीको अडान छ । साथै उनीहरुले जिल्ला प्रशासन कार्यालयमा हुट हटाउन नसकिने ब्यहोराको जानकारी गराइ सहजीकरण गरिदिन समेत आग्रह गरेका छन् ।