featured photo: Birat Post

विराटनगर,७ असोज । नेपाली कांग्रेसका केन्द्रीय सदस्य भीम पराजुलीले सहमहामन्त्री महेन्द्र यादवमाथि खुकुरी प्रहार घटनामा सरकारमा सम्मिलित नेताहरूको धारणा माग गरेका छन् । आइतबार बसेको जारी कांग्रेस केन्द्रीय समिति बैठकमा बोल्दै उनले यस्तो धारणा राखेका हुन् । बैठकमा कडारुपमा प्रस्तुत भएका पराजुलीले भने , ‘सरकारमा हाम्रा नेताहरु पनि सहभागी हुनुहुन्छ ,भइरहेको के छ ? भनी प्रतिप्रश्न गरेका थिए ।

‘कांग्रेसलाई छानिछानि दु:ख दिने गृहमन्त्रीको नियतबारे पनि समीक्षा हुनुपर्छ,’ उनले भने, ‘सुन प्रकरणमा नेकपा माओवादीका उपाध्यक्ष कृष्णबहादुर महराको नाम समाचारमा आएका छन्। उनलाई न पक्राउ गरिन्छ न कुनै मुद्दा चल्छ।’ कांग्रेस नेता माथी आक्रमण गर्ने र आफ्ना बचाउने खेलमा माओवादी लागेको आरोप पराजुलीले लगाए ।

महँगी नियन्त्रणमा सरकारले कदम चाल्नुपर्ने उनले बताए। कोशी प्रदेशमा सरकारको स्थिरताका लागि राष्ट्रिय प्रजातन्त्र पार्टीसँग निर्णायक वार्ता गरी नयाँ समीकरण निर्माण गर्नुपर्नेमा उनले जोड दिए । ‘कोशी प्रदेशको सरकार गठन सन्दर्भमा राप्रपासँग तालमेल नगरिकन अघि बढ्दा पटक -पटक अस्थिरता दोहोरिएको छ। कोशीमा सरकारको स्थिरता खोज्ने हो भने राप्रपासँग निर्णायक बार्ता गरौं,’ उनले भने।

हिन्दु राष्ट्रका पक्षमा आफुले पटक-पटक आवाज उठाउने गरेको बताउदै पराजुलीले कांग्रेसले धर्म संस्कृति विभाग गठन गर्नुपर्ने कुरालाई आफुले निरन्तर उठाइरहने बताए । केही समययता संविधानको बर्खिलाप गर्दै गौबध भइरहेको र सरकारले अपराधका घटनालाई प्रसय दिइरहेको आरोप लगाए । देशमा युवा पलायन एवं बौद्धिकता र सीपको पलायन हुदै गएको तर्फ ध्यान दिन आवश्यक रहेको औल्याए । खेलाडिको सम्मानमा ध्यान नदिएको र नर्सिङ शिक्षा पढ्न बिदेशिनु परेको व्याप्त समस्याका विषयमा आफ्ना भनाइ राखेका थिए ।