featured photo: Birat Post

कौशल निरौला

विराटनगर,२३ चैत । आम मानिसले जहिल्यै मन लाग्यो या समय मिल्यो कपाल मिलाउने,दाह्री काट्ने या कपाल मुण्डन गर्ने गर्छन् । धार्मिक मान्यताका धेरै कुराहरु हराउदै गइरहेका बेला मानिसहरुले समय मिलाएर वा बार मिलाएर कपाल काट्ने भन्नेकुरा धेरै परको कुरा हुन जान्छ । कतिलाई यो विषय अनौठो पनि लाग्न सक्छ ।

यद्यपी नेपाल -भारतका चर्चित तथा धार्मिक प्रवृत्तिका नेताहरु पुरातन मूल्य मान्यतालाई पनि ख्याल राख्छन् । विराटपोष्टले यही विषयमा धेरै नेताहरुको दैनिकचर्या र शारीरिक स्वास्थ्यका विषयमा अध्ययन समेत गर्दै आएको छ ।

नेपाली कांग्रेसका केन्द्रीय सदस्य तथा प्रभावशाली नेता डा.शेखर कोइराला शुक्रबार मात्रै कपाल काट्छन् । धार्मिक दृष्टिकोणले बुधबार र शुक्रबार कपाल,दाह्री काट्नु राम्रो मानिन्छ । यसले मानिसलाई उत्तम आयुको तथा स्वस्थ्य र धनबान बनाउछ भन्ने धार्मिक मान्यता रहेको छ । आयुर्वेदका ज्ञाताहरुले समेत शुक्रबार उत्तमबार भनेका छन् ।

बिहिबार मोरङ उद्योग व्यापार संघको ६७ औं बार्षिक साधारणसभा को उद्घाटनका लागि विराटनगर आइपुगेका नेता कोइरालाले शुक्रबार विराटनगरमा कपाल काटेका छन् । कोइरालाका स्वकीय सचिव दिनेश थपलियाले अधितमरुपमा भ्याए सम्म शुक्रबारका दिन कपाल काट्ने गरेको पुष्टी गरे । काेइराला गृहनगर विराटनगर आएकाबेला शैलुनमै गएर दाह्री ,कपाल काट्ने गरेका छन् । मातृका गल्लीमा अनिल ठाकुरले खाेलेकाे शैलुनमा मात्रै उनी कपाल काट्छन् ।कोइराला शारीरिकरुपमा पनि आफुलाई तन्दुरुस्त र सफा राख्न सफल देखिन्छन् ।

भारतीय सञ्चारमाध्यमका अनुसार भारतीय प्रधानमन्त्री नरेन्द्र मोदी पनि बुधबार र शुक्रबार मात्रै कपाल,दाह्री मिलाउने गर्छन् । तिथि,महिना र गतेको समेत ख्याल गर्ने गरेको सञ्चारमाध्यमले उल्लेख गरेका छन् । यस्तै भारतको उत्तरप्रदेशका मुख्यमन्त्री आदित्यनाथ योगीले समेत बुधबार या शुक्रबार मात्रै कपाल मुण्डन गर्ने गर्छन् ।
नेता कोइराला वा भारतका विशिष्ट व्यक्तिहरु मात्रै होइन अन्य धेरै चर्चित मानिसहरु यस्ता छन् जसले पुरातन मान्यताहरुलाई पालना गर्दै आएका छन् जुन हामी क्रमशः प्रस्तुत गर्दै जानेनै छौं ।