featured photo: Birat Post

विराटनगर,४ जेठ । राष्ट्रिय प्रजातन्त्र पार्टी नेपालका अध्यक्ष कमल थापाले यही जेठ १५ गतेदेखि काठमाडौँ केन्द्रित जनआन्दोलन सफल पार्नकालागि कांग्रेसका हिन्दुवादी खेमाका नेताहरुसंग संवाद भइरहेको खुलासा गरेका छन् ।

आइतबार विराटनगरमा पत्रकारसँग कुरा गर्दै अध्यक्ष थापाले कांग्रेसका उच्च तहका नेताहरु तथा केही सांसदहरुसंग नजिकवाट कुरा भइरहेको दावी गरे । यस्तै नेकपा एमाले,नेकपा माओवादीका समेत केही सांसद तथा नेताहरुसंग समेत छलफल भइरहेको उनको भनाइ थियो । उनले भने, “उहाँहरुको पनि राजनैतिक दायराको कुरा छ । म यी नेताहरु संग कुरा भएको भनेर चाही भन्दिन । यति भन्छु उहाँहरुले आन्दोलनलाई सहयोग गर्नु हुन्छ ।”

काठमाडौँको सडक जनआन्दोलनमा धेरै भन्दा धेरै संख्यामा जनतालाई सहभागिता गराउन आफू प्रचार–प्रसारका लागि जिल्ला दौडाहामा रहेको बताए । आइतबार विराटनगरमा पत्रकारसँग भेटघाट गरेर अध्यक्ष थापा सुनसरीको कार्यक्रममा सहभागी भएका थिए ।

भ्रष्ट शासन प्रणाली विरुद्ध काठमाडौँको सडकमा जनता उतारेर सडकबाटै जनआन्दोलनलाई सफल बनाउने उद्देश्यका साथ विभिन्न अभियान तथा दलका ४४ घटकहरु आन्दोलनको तयारीमा जुटेको अध्यक्ष थापाले बताए । राष्ट्रिय प्रजातन्त्र पार्टी, राष्ट्रिय प्रजातन्त्र पार्टी नेपाल, सडक जनआन्दोलनको मुख्य घटक राजनीतिक दल रहेको अध्यक्ष थापाले बताए ।

नेपालको संविधान २०७२ लाई संशोधन गरेर राजसंस्थालाई पुनर्स्थापना गरेको खण्डमा जनआन्दोलन फिर्ता हुन सक्ने अध्यक्ष थापाले बताए । हिन्दु राज्य र राजसंस्थाको स्थापना, प्रदेश खारेज गरेर केन्द्र र स्थानीय तह गरी दुई तहको सरकार, भुईँ मान्छेलाई राहत प्रदान र सुशासन एवं समृद्धिका लक्ष्य जनआन्दोलनको बटम लाइन रहेको अध्यक्ष थापाले बताए ।

राष्ट्रिय प्रजातन्त्र पार्टी नेपालका उपाध्यक्षद्वय बल्लभप्रसाद दाहाल र तेजकुमार कुरुङबाङ, कोशी प्रदेश अध्यक्ष माधव आचार्य पत्रकार सम्मेलनमा सहभागी थिए ।