featured photo: Birat Post

विराटनगर,१६ जेष्ठ । विराटनगरमा ‘नेपाली चलचित्रमा साहित्य विषयक गोष्ठी तथा चलचत्रि निर्माण सम्बन्धी तीनदिने कार्यशाला–२०८२’ बिहीबारदेखि शुरू भएको छ । चाँदनी फिल्म विराटनगरको आयोजना र चलचित्र विकास बोर्ड, काठमाडौको सहकार्यमा कोशी प्रदेशका आन्तरिक तथा कानुन मन्त्री रेवती रमण भण्डारीले कार्यशालाको उद्घाटन गरेका थिए ।

साहित्यकार एवं गजलकार मधु पोखरेलले अध्यक्षता गरेको कार्यक्रममा बोल्दै चाँदनी फिल्मका अध्यक्ष केशब रायमाझीले साहित्कार र चलचित्रकर्मीबीचको प्रगाढ सम्बन्ध स्थापनाका लागि कार्यशाला सहयोगी सिद्ध हुने बताए । उनले साहित्यको सानो दायरालाई ठूलो दायरामा पु¥याउन चलचित्रले मद्दत गर्ने बताए ।

अर्का वक्ता प्राध्यापक रमेश दाहालले साहित्य र चलचित्रका विविध आयामबारे आख्यान दिँदै साहित्यकारले चलचित्रमा कसरी लेख्ने भनेर कार्यशालाले सिकाउने बताए । प्राध्यापक दाहालले साहित्य र चलचित्रको सम्बन्ध समाजसँग भएकोले दुवैले सामाजिक मूल्य र मान्यता, विकृति र विसङ्गति अनि समाज रूपान्तरणको सवाललाई गहनताकासाथ उठाउने गरेको बताए । उनले साहित्यको उत्कृष्टता कलम र चलचित्रको क्यामेरा रहेको बताए । प्रशिक्षक विजय सुब्बाले चलचित्रमा प्रयोग गरिने भाषा साहित्यमा प्रयोग गरिने भाषाभन्दा फरक भएपनि सन्देश एउटै हुने बताए ।

मन्त्री भण्डारीले कोशी प्रदेश सरकार साहित्य र चलचित्रको विकासका लागि दृढ रहेको बताए । उनले साहित्य र चलचित्र क्षेत्रको उन्नयनका लागि सरकार गम्भीर रहेको बताए । कार्यक्रममा चलचित्र क्षेत्रमा लामो समय योगदान गरेका निर्देशक सन्तोष सरकार, गायक दिनेश राई, नृत्य निर्देशक कविता भुषाल लगायतलाई सम्मानित गरिएको थियो । कार्यक्रममा गायक नितिन गजुरेल, रामा मण्डलले गीत गाएका थिए भने स्थानीय कलाकारले विभिन्न भेषभुषामा आकर्षक नृत्य प्रस्तुत गरेका थिए । आधा दर्जन साहित्यकारहरूले आ–आफ्नो सिर्जना वाचन गरेका थिए ।