शुक्रबार काठमाडौँमा आयोजित एक कार्यक्रमलाई सम्बोधन गर्दै उनले गलत काम गर्न नहुने र सही काम गर्न नसके चुप लागेर घरमै बस्न सुझाव दिए।

उनले दिनानुदिन भ्रष्टाचारले अफ्ठ्यारो पारिरहेको भन्दै सुशासन दिन सक्नुपर्ने बताए। पदाधिकारी बैठकमा प्रधानमन्त्री केपी शर्मा ओलीले जेठ १५ गते काठमाडौँ एमालेको कब्जामा राख्नुपर्छ भन्ने अभिव्यक्ति दिएकोबारेमा छलफल हुने सोचे पनि आफ्नोबारेमा छलफल भएको भन्दै आपत्ति जनाए।

उनले प्रधानमन्त्री ओलीको उक्त अभिव्यक्तिप्रति राष्ट्रिय ममानव अधिकार आयोगले सचेत गराएपछि प्रधानमन्त्री आयोगको वार्षिकोत्सव कार्यक्रममै बहाना बनाएर नगएको आरोप लगाए।

उनले राष्ट्रिय मानव अधिकार आयोगको वार्षिकोत्सवमा प्रधानमन्त्री नजाने हो भने कस्तो लोकतन्त्र हामीले खोजिरहेका छौँ भन्दै प्रश्न गरे।

‘राष्ट्रिय मानव अधिकार आयोग, जसलाई संवैधानिक अधिकार दिएको छ। उहाँहरुले पनि वक्तव्य जारी गरिकन प्रधानमन्त्रीले यसरी बोल्नु हुँदैन भन्नुभयो। भोलिपल्ट १४ गतेको दिन प्रधानमन्त्रीजी त्यहाँ जानुपर्ने थियो। उहाँले वार्षिकोत्सवमा बहाना बनाएर जानु भएन। प्रधानमन्त्रीजीलाई फुर्सद भएन भनियो। राष्ट्रिय मानव अधिकार आयोगको वार्षिकोत्सवमा प्रधानमन्त्री नजाने हो भने कस्तो लोकतन्त्र हामीले खोजिरहेका छौँ?’

उनले एमालेको जुलुसभन्दा राष्ट्रिय प्रजातन्त्र पार्टीको जुलुस ठूलो हुनु युवाहरुमा आएको नैराश्यताको परिणाम भएको बताए। उनले अहिलेका नेताहरुको आचरण लोकतान्त्रिक गणतन्त्रको नभएको बताए।

उनले भने, ‘राष्ट्रिय प्रजातन्त्र पार्टीको जुलुस र एमालेको जुलुस के थियो भन्ने कुरा छुनुभयो। किन कमजोर भयो? किनभने हाम्रो आचरण लोकतान्त्रिक गणतन्त्रको आचरण नै भइरहेको छैन। युवाहरुमा नैराश्यता रहेको छ। उनीहरुले बाटो खोजिरहेका छन्। उनीहरुले राजाको शासनकाल कस्तो थियो, उनीहरुले त यही ४ जनाको म्युजिकल चियर देखेका छन्। अनि उनीहरु कहाँ जाने? हामीले असल काम गरेर युवाहरुको मन जित्न सक्नुपर्छ।’