Birat Post शनिबार, जेठ १८, २०८२ मा प्रकाशित
काठमाडौँ १७ जेष्ठ / राजसंस्था र हिन्दुराष्ट्र स्थापनाका लागि राजसंस्थाहरू पक्षधरले आन्दोलन गर्न थालेको आज तीन दिन भएको छ। बिहीबार गणतन्त्र दिवसको अवसर पारेर आन्दोलन थालेका उनीहरूले तीन दिन तीन फरक ठाउँमा आन्दोलन गरे।
बिहीबार रत्नपार्क (शान्तिबाटिका) क्षेत्रमा आन्दोलन गरेका थिए भने शुक्रबार माइतीघरदेखि नयाँ बानेश्वरसम्म आन्दोलन गरे। आज शनिबार रन्तपार्कदेखि बालुवाटारसम्म र्याली गर्दै आन्दोलन गरेका छन्।
आज रत्नपार्क हुँदै कमलादी, कृष्ण पाउरूटी उद्योग, सिटी सेन्टर, नक्सालन हुँदै खुर्सानीटारमा पुगेर र्याली सभामा परिणत भएको थियो। अघिल्लो दुई दिन भएको आन्दोलनबाट उत्साहित भएका राजावादीहरू आजका लागि नारायणहिटीअगाडि नै प्रदर्शन गर्ने तयारीमा थिए।
तर सरकारले नारायणहिटी क्षेत्र वरपर निषेधित क्षेत्र घोषणा गरेपछि उनीहरू आज प्रधानमन्त्री निवास बालुवाटारतिर केन्द्रित भएका थिए। आजको आन्दोलनमा प्रहरीले धरपकडसमेत गरेको छ।
आन्दोलनरत केही युवाहरूको समूह निषेधाज्ञा क्षेत्र नारायणहिटीतिर जान खोजेपछि प्रहरीले धरपकड गर्दै कम्तिमा दुई युवालाई नियन्त्रमा लिएको प्रत्यक्षदर्शीले बताएका थिए।
त्रिचन्द्र क्याम्पस अगाडि प्रहरीले धरपकड गरेको थियो। सरकारले निषेधाज्ञा जारी गरेर आन्दोनलाई साँघुरो बनाउन थालेपछि निषेधाज्ञा आन्दोलनकारीहरूले अवेज्ञा नै नगरे पनि आन्दोलनलाई आज बालुवाटारतिर केन्द्रित गरे।
आन्दोलनमा भूतपूर्व सेनासँगै पूर्वसुरक्षाकर्मीहरूको सहभागिता पनि देखिन्छ। तीन दिन आन्दोलन गर्दा राजसंस्था पक्षधरहरू उत्साहित देखिन्छन्। राप्रपाका प्रवक्ता मोहन श्रेष्ठले आन्दोलन सफल रुपमा अगाडि बढेको बताए।
आजै आन्दोलनको समीक्षा गर्न राप्रपाको केन्द्रीय कार्यसम्पादन समितिको बैठक पनि बसेको थियो। बैठकले आन्दोलन सही रुपमा अगाडि बढेको निष्कर्ष निकालेको प्रवक्ता श्रेष्ठले बताए।
आन्दोलन अझ सशक्त बनाउन जनसहभागिता बढाउनुपर्ने बैठक निष्कर्ष पनि छ। जनसहभागिता बढाउन बैठकले वडा तथा टोलहरूमा भेटघाट र छलफल गर्नुपर्ने निष्कर्ष निकालेको श्रेष्ठले बताए।
आन्दोलन भोलि पनि निरन्तर हुनेछ। भोलि आइतबार दिनको २ बजे नारायणचौरमा आन्दोलनको कार्यक्रम गर्ने राजसंस्थापक्षधरको तयारी छ।
आन्दोलनमा सहभागी नेता तथा कार्यकर्ताहरु पक्राउ परेसंगै राजावादीहरु थप आक्रामक
राजाबादी आइलाग्छन् भने ईटको जवाफ पत्त्थरले दिने हो : प्रचण्ड
राजावादीहरुद्वारा प्रधानमन्त्री र गृहमन्त्रीको पुत्ला दहन
विराटपोष्ट डिजिटल प्रा.लि.
विराटनगर – मोरङ ,नेपाल
कम्पनी दर्ता प्रमाणपत्र नं.:२२७८४३/०७६/०७७
स्थायी लेखा नं.:६०९६५५९५५
सूचना तथा प्रसारण विभाग दर्ता नं:१६६५/०७६/०७७
Email: [email protected]
