featured photo: Birat Post

विराटनगर,३ असार । नेपाल औषधी व्यवसायी संघ (एनसीडिए) ५२ औं स्थापना दिवसको अवसरमा सप्ताहव्यापी विविध कार्यक्रम आयोजना गर्ने मोरङ शाखाले घोषणा गरेको छ। एनसीडिए मोरङ शाखाले विराटनगरमा मंगलबार पत्रकार सम्मेलन गरि असार ४ गतेदेखि १० गतेसम्म विभिन्न कार्यक्रम आयोजना गरेर संघको स्थापना दिवस मनाउने जानकारी गराएको हो ।

२०३० मा स्थापित संघले औषधी व्यवसायको प्रवर्धन, अनुशासन र सामाजिक उत्तरदायित्व वहन गर्दै आएको संघका अध्यक्ष देशबन्धु ढकालले बताए । ‘‘हरेक वर्ष असार १० गते मनाइने हाम्रो स्थापना दिवसलाई यस पटक विशेष बनाउन सप्ताहव्यापी कार्यक्रम आयोजना गरेका छौं,’ अध्यक्ष ढकालले पत्रकार सम्मेलनमा भने, ‘हामी केवल व्यापारिक गतिविधिमा मात्र सीमित नरहेर समुदायिक स्वास्थ्य सेवा र सामाजिक कल्याणमा योगदान पुर्याउनुपर्छ। यस वर्षको कार्यक्रमले हाम्रो त्यही प्रतिबद्धतालाई प्रतिबिम्बित गर्दछौं ।’ सप्ताहव्यापी कार्यक्रम अन्र्तगत पहिलो दिन असार ४ गते विराटनगरस्थित कोशी अस्पतालको बाल विभाग तथा कुपोषण शाखामा फलफूल वितरण कार्यक्रम हुनेछ । यसका संयोजक थोक उपाध्यक्ष जितु कुमार रजक र सह कोषाध्यक्ष राजकुमार यादव रहेका छन्।

त्यसैगरी असार ५ गते विराटनगरस्थित हिमालय दर्शन कलेजमा लागुऔषध र मनोदीपक औषधी सम्बन्धी जनचेतनामूलक कार्यक्रम आयोजना हुनेछ। यो कार्यक्रम संयोजक संघका महासचिव अरुण कुमार ठाकुर ब्राह्मण रहेका छन् । असार ६ गते जिल्ला ट्राफिक प्रहरी कार्यालय मोरङमा लागुपदार्थ परीक्षण किट हस्तान्तरण गरिनेछ। वरिष्ठ उपाध्यक्ष हरिराज रेग्मी संयोजक रहेका छन्। असार ७ गते विराटनगर ८ स्थित विराटेश्वर वृद्धाश्रममा स्वास्थ्य सामग्री हस्तान्तरण कार्यक्रम हुनेछ। सचिव सरिता श्रेष्ठ चौधरी संयोजक रहेकी छिन्। असार ८ गते संघको भवन विराटनगरमा वरिष्ठ औषधी व्यवसायी तथा सामाजिक योगदानकर्ताहरूको सम्मान कार्यक्रम आयोजना हुनेछ।
असार ९ गते हस्पिटल चोक विराटनगरमा रक्तदान कार्यक्रम सञ्चालन हुनेछ। कोषाध्यक्ष मनोज कुमार मण्डल र थोक सदस्य राजेश मण्डल संयोजक रहेका छन् । असार १० गते मुख्य स्थापना दिवसका दिन बिहान ७ बजे हस्पिटल चोकदेखि संघको भवनसम्म प्रभातफेरी हुनेछ। त्यसपछि ९ बजे झण्डोत्तोलन र औपचारिक समापन समारोह आयोजना हुनेछ। साँझ दीप प्रज्वलन कार्यक्रमसहित समापन हुनेछ। खुद्रा उपाध्यक्ष मुकेश श्रीवास्तव संयोजक रहेका छन्।

अध्यक्ष ढकालले भने, ‘यस सप्ताहव्यापी कार्यक्रममार्फत औषधी व्यवसाय क्षेत्रको सामाजिक उत्तरदायित्वलाई थप मजबुत पार्दै समाजप्रति योगदान पुर्याउने लक्ष्य लिएका छौं। ’ उनले सम्पूर्ण व्यवसायी, सरोकारवाला निकायहरू, पत्रकार मित्रहरू र आम नागरिकहरूलाई कार्यक्रममा सहभागिताको लागि अनुरोध गरे।

सम्बन्धित

विराटनगरमा पूर्वप्रधानमन्त्री कोइराला र लायन्स संस्थापक मेल्भिनको सालिक अनावरण

मेयर र उपमेयरबीचको विवाद : धरान उपमहानगरपालिका तनावग्रस्त

आजदेखि सुनचाँदी पसल खुल्ने

रवीन्द्र मिश्र अदालतमा उपस्थित, थुनछेक बहस सुरु