featured photo: Birat Post

विराटनगर,१३ भदौ । विराटनगरस्थित शिक्षादीप कलेजले यस वर्ष पनि ‘शान्तिको लागि निःशस्त्रीकरण’ विषयक कविता प्रतियोगिता सम्पन्न गरेको छ। आणविक हतियार परीक्षण विरुद्धको अन्तर्राष्ट्रिय दिवस, अगस्ट २९ को अवसर पारेर आयोजित यस प्रतियोगिताले विद्यार्थीहरूमा आणविक हतियारको विनाशकारी प्रभाव र निःशस्त्रीकरणको आवश्यकता बारे गहिरो चेतना फैलाउने उद्देश्य राखेको थियो।

प्रतियोगितामा विज्ञान संकायको कक्षा १२ मा अध्ययनरत छात्रा सिरिन भट्टराईले उत्कृष्ट प्रदर्शन गर्दै प्रथम स्थान हासिल गरेकी छन्। अलिसा सापकोटाले द्वितीय स्थान प्राप्त गरिन् भने मानसी मनोहर र प्रतिक भट्टराईले संयुक्त रूपमा तृतीय स्थान हासिल गरेका छन्।

सान्त्वना पुरस्कार प्राप्त गर्ने विद्यार्थीहरूमा सभ्यता रायमाझी, अपेक्षा राई, जस्मिन ढुंगाना, सुदिस साह, पंकज साह, मुस्कान खातुन, सहिष्णुता वराल, सम्राज्ञी बस्नेत र पूर्णिमा बुढाथोकी रहेका छन्। कलेजको विज्ञान संकायअन्तर्गत कक्षा ११ र १२ मा अध्ययनरत ६० जना विद्यार्थीहरूले यस प्रतियोगितामा उत्साहपूर्वक सहभागिता जनाएका थिए।

कलेजका प्रमुख निर्देशक रमेश मण्डल, कवि एवं निर्णायक चुडामणि नेपाल ‘अकिन्चन’ र कलेजका अंग्रेजी विभागका निर्देशक डा. विमल किशोर श्रीवास्तव र कलेजका निर्देशक भुपेन्द्र दाहा(भूपी) लगायतको उपस्थितिमा विजेता विद्यार्थीहरूलाई नगद पुरस्कार र बहुमूल्य पुस्तकहरू वितरण गरिएको थियो ।
निर्देशक दाहालले प्रतियोगितामा विज्ञान संकायका ६० जना विद्यार्थीले भाग लिएको जानकारी दिए ।