featured photo: Birat Post

विराटनगर ५ माघ /
विराटनगर महानगरपालिकामा सडकको सुन्दरता अभियान आरम्भ भएको छ । महानगरपालिका र रोटरी क्बल अफ विराटनगर डाउन टाउनको सहकार्यमा आइतबारबाट नयाँ निर्माण भएका सडकछेउका पोलहरुमा फूलसहितका गमला र फोहोर संकलन गर्ने डस्टबिन राख्न थालिएको हो ।
यस कार्यका लागि विराटनगर महानगरका मेयर भीम पराजुलीले निजिक्षेत्रको सहकार्यमा शहरको विकास अगाडी बढाउने उद्घोष गरेका थिए । रोटरी डाउनटाउनकी अध्यक्ष अर्चना तापडियाले विराटनगरलाई सुुन्दर बनाउने अभियानअन्तर्गत महानगरसँग सहकार्य गरि काम थालेको बताइन । उनले तीनपैनी चौकदेखि ट्राफिक चौकसम्म ९० पोलमा गमला र डस्टबिन राख्ने बताइन ।
महानगर प्रमुख भीम पराजुलीले विराटनगरमा सडक पुनर्निर्माणको काम लगभग पूरा भएको र अवको काम सरसफाइ र सौन्दर्यीकरण भएको बताए । सडक सफाइ र फोहोर व्यवस्थापनका लागि स्थानीयसंग सहकार्य र पहल गर्ने कार्यलाई निरन्तरता दिने बताए ।
रोटरीका गभर्नर किरणराज श्रेष्ठले स्थानीय सरकारसँगको सहकार्यमा रोटरीले सामाजिक कामलाई तीव्र बनाइएको बताए । यस्तै कार्यक्रमबारे जानकारी दिनेक्रममा संयोजक रचना राठीले रोटरीले समाजमा नागरिक उत्तरदायित्वअन्तर्गत कार्यक्रम गर्दे जाने बताइन । कार्यक्रममा विराटनगर महानगर उपमेयर इन्दिरा कार्की,प्रमुख प्रशासकिय अधिकृत एकदेव अधिकारी ,रोटरियन भैरव रिजाल,समाजसेवी बेनीगोपाल मुन्दडा लगायतको सहभागिता रहेको थियो ।