featured photo: Birat Post

विराटनगर २१ जेष्ठ ।
विराटनगर महानगरपालिकाले वडा नं. १६ दरैयामा स्वास्थ्यकेन्द्र स्थापना गरेको छ । यो वडा भारत संग जोडिएको वडा पनि हो । स्थानीयमा स्वास्थ्य सेवाको पहुच बढाउने उदेश्यका साथ स्वास्थ्यकेन्द्र स्थापना गरेको हो । स्वास्थ्य केन्द्र नहुदा बिशेष गरी बृद्धवृद्धा,गर्भवती र बालबालिकाहरुले समस्या भोगिरहेका थिए । एक जना डाक्टर र नर्स रहने गरी स्वास्थ्यकेन्द्र स्थापना भए संगै स्थानीयहरुले खुसी व्यक्त गरेका छन् ।

स्वास्थ्यचौकीको बुधवार एक अनौपचारिक कार्यक्रमका वीच विराटनगर महानगरका मेयर भीम पराजुलीले उद्घाटन गरेका छन्। नगरका हरेक क्षेत्रमा स्वास्थ्य सेवा उपलब्ध गराउने उदेश्यका साथ महानगरले काम गरिरहेको मेयर पराजुलीले बताए । कोरोनाका कारण सामान्य जाच गर्न समेत कठिनाइ भइरहेको अबस्थालाई मध्यनजर गर्दै महानगरले काम गरिरहेको बताए ।

यस्तै वडाध्यक्ष मनोज सुव्वाले जटिल परिस्थितीमा स्थापना भएको स्वास्थ्यकेन्द्रबाट वडावासी खुसी भएको बताए । यसका लागि थप स्वास्थ्य परिक्षणका दायर बढाउन सुव्वाले मेयर पराजुली संग आग्रह गरे । स्वास्थ्यकेन्द्रबाट स्थानीयस्तरमा उत्कृष्ट सेवा प्रवाह गर्ने गरी थप गृहकार्य भइरहेको विराटनगर महानगर स्वास्थ्य महाशाखा प्रमुख रमेश कार्कीले जानकारी दिए । महानगरले यसभन्दा अगाडि वडा नं.४ को इक्राइ चोकमा आधारभूत स्वास्थ्यकेन्द्र स्थापना गरेको छ ।