featured photo: Birat Post

विराटनगर २५ जेष्ठ ।
प्रदेश १ मा आइतबार एकैदिन १० जनामा कोरोना भाइरसको संक्रमण पुष्टि भएको छ । विराटनगर महानगरपालिका वडा नम्बर तीनकी २२ बर्षीय युवतीमा कोरोना संक्रमण पुष्टि भएको छ । यसैगरी सुनसरीको इनरुवा नगरपालिका वडा नम्बर आठ र दुईका २३ र २६ बर्षीय पुरुषमा कोरोना संक्रमण पुष्टि भएको हो । यस्तै रतुवामाई नगरपालिका वडा नम्बर दुईका १८ र १४ बर्षका दुई किशोरमा कोरोना संक्रमण पुष्टि भएको छ । उदयपुरमा पुनः तीन जनामा कोरोना संक्रमण पुष्टि भएको छ । तीन दिन अघि स्वाब संकलन गरी काठमाडौंको टेकुस्थित जनस्वास्थ्य प्रयोगशालामा गरिएको परिक्षणमा तीन जनामा कोरोना संक्रमण पुष्टि भएको हो । कोरोना पुष्टि भएका मध्ये बेलका नगरपालिका ३६ बर्षीय पुरुष र २७ बर्षीया महिला रहेका छन् भने चौदण्डीगढी नगरपालिकाका ३६ बर्षीय पुरुष रहेका छन् । संक्रमित तीनैजनालाई विराटनगरको कोशी अस्पताल कोभीड १९ उपचार केन्द्रमा ल्याइदैछ । यस्तै झापा अर्जुनधारा नगरपालिका वडा नम्बर दुइका २३ र २७ बर्षीय पुरुषमा कोरोना संक्रमण पुष्टि भएको छ । प्रदेश नम्बर एकमा दुई सय ५४ जनामा अहिलेसम्म कोरोना संक्रमण पुष्टि भएको हो । जसमा झापामा एक सय ३८, मोरङमा १९, सुनसरीमा ४१, धनकुटामा ८, तेह्रथुममा २, संखुवासभामा २, भोजपुरमा ६, खोटाङमा ४ , सोलुखुम्बुमा १र उदयपुरमा ३६ जनामा कोरोना संक्रमण पुष्टि भैसकेको प्रदेश १ सामाजिक विकास मन्त्रालयले जनाएको छ ।