featured photo: Birat Post

विराटनगर १३ असोज ।
विराटनगर महानगरपालिकामा लिन लागिएको कक्षा ११ को परीक्षा स्थगित गरिएको छ । महानगरले विज्ञप्ति जारी गरेर सञ्चालन हुने भनिएको परिक्षा अर्को सूचना नआए सम्मको लागि स्थगित गरेको जानकारी दिएको छ । असोज २५ बाट परीक्षा सञ्चालनको तालिका सार्वजनिक गरेको महानगरले पछिल्लो समय केही शिक्षक तथा कर्मचारीहरुमा कोरोना संक्रमण देखिएको साथै अभिभावक तथा विद्यार्थीको भावना बुझ्दै तत्काल परिक्षा स्थगित गरेको बताएको छ ।

सरकारले दिएको अधिकार प्रयोग गर्दै परीक्षा लिने तयारीमा जुटेको महानगर पछाडी सरेको छ । मंगलबार महानगरका कार्यवाहक प्रमुख प्रशासकिय अधिकृत दुर्गा प्रसाद खतिवडाद्धारा जारी विज्ञप्तिमा अर्को सूचना जारी नभएसम्मका लागि परिक्षा स्थगित गरिएको उल्लेख छ । यस संगै नगर शिक्षा समितिको निर्णय अनुसार असोज १ गते देखी विद्यालयले मासिक शुल्क मात्र लिन पाउने व्यवस्था भएकोले सोही अनुरुप गर्न पनि आग्रह गरिएको छ । शुल्क संग जोडिएर गरिएका टिकाटिप्पणीमा कुनै सत्यता नभएको विज्ञप्तिमा जनाइएको छ ।

यस्तै महानगरका मेयर भीम पराजुलीले सरकारको गलत निर्देशनका कारण समस्या सिर्जना भएको बताए । कक्षा ११ को परीक्षा तत्काल आवश्यक नभएको हाम्रो पनि ठम्याइ थियो तर सम्बन्धित निकायबाट स्थानियतहलाई अनावश्यक झमेलामा फसाउने काम समेत भएको पराजुलीले बताए । अवस्था सहज हुदाको परिस्थितीमा मात्र परिक्षा लिन सकिने कुराको जानकारी गराउनका साथै परिक्षा स्थगित गर्न मातहतका निकायलाई जानकारी गराइएको बताए ।

परिक्षा संगका आवश्यक समस्या सुल्झाउन सरकारले विशेष निर्णय गर्नुपर्ने बेला आएको मेयर पराजुलीले बताए । सबै तहका लाखौ विद्यार्थी परिक्षा नहुदा उच्च शिक्षा लिनबाट वञ्चित भइरहेको बताए । उनले लाखौ विद्यार्थीको भविष्य अन्यौलमा नपार्न सम्बन्धित पक्षहरुले आवाज उठाउन जरुरी भएको बताए ।

महानगरद्धारा जारी विज्ञप्ति: