featured photo: Birat Post

विराटनगर २७ मंसिर ।
सडक,पेटि र पोल सफाई अभियानलाई पहिलो प्राथमिकतामा राखेर काम गर्दै आएको विराटनगर महानगर थप सफाई अभियानमा जुटेको छ । सडक सौन्दर्यीकरण अभियान अन्तरगत लत्रेका पोल बाध्ने,पोलमा अनावश्यक रुपमा झुण्डिएका पर्चा पम्पलेट निकाल्ने र पार्किङलाई समेत व्यवस्थित बनाउने अभियानमा जुटेको छ ।

विराटनगर महानगरको नगर प्रहरीले यसको तारतम्य मिलाएको छ भने सरसफाईका लागी थप जनशक्ति समेत परिचालन गरिएको छ । विराटनगरको मेनरोडमा रहेका सबै तारहरु बाध्ने काम भएका छन् भने अनावश्यक पोष्टरहरु हटाइन थालिएको छ ।

सडक सौन्दर्यीकरणका लागि नियमित अनुगमन र व्यवस्थापन गरिने महानगर प्रहरी प्रमुख राजन पौडेलले जानकारी दिए । उनले सबैको साथ सहयोगले सहर सुन्दर हुने बताए । महानगरले गरिरहेका सूचना अवज्ञा गरेर फोहरमैला गर्नेहरुमाथी कानूनत कार्वाहीको दायरामा ल्याइने बताए । कसैले अनुमती नलिइ पोष्टर टासेमा आवश्यक कार्वाही गरिने भएको छ । फोहरहरु जथाभावी फाल्नेहरुको नियमन गरिने भएको छ भने चौपाया समेत छाडा छाड्नेहरुलाई कार्वाहीको दायरामा ल्याइने भएको छ ।

सफा सुन्दर र शान्त विराटनगर भन्ने मूल लक्ष्यका साथ काम गर्न मेयर पराजुलीले आफ्ना मातहतका सरोकार सम्बन्ध शाखा प्रमुखहरुलाई निर्देशन समेत दिएका छन् । यस संगै विराटनगरका सबै स्थानहरुमा सफाई अभियान द्रुतगतिमा बढेको छ ।