विराटनगर, ११ माघ ।
प्रदेश नं १ का प्रदेश प्रमुख सोमनाथ अधिकारी समक्ष अख्तियार दुरुपयोग आयोगको ३० औं बार्षिक प्रतिवेदन हस्तान्तरण गरिएको छ ।
प्रदेश प्रमुख अधिकारी समक्ष नेपालको संविधानको धारा २९४ को उपधारा (३) वमोजिम आयोगको आव २०७६/७७ को बार्षिक प्रतिवेदन आयोगका इटहरी प्रदेश कार्यालयका प्रमुख प्रकाश पौडेलले आइतबार हस्तान्तरण गरेका छन् ।
उक्त अवसरमा प्रदेश प्रमुख अधिकारीले मुलुकलाई अनुशासित कायम गर्न आयोगको भूमिका प्रशंसनीय रहेको रहेको र अझै बास्तविक धरातलमा टेकेर अनुसन्धानलाई अगाडी बढाउनुपर्नेमा जोड दिए । उनले आयोग मुलुकको भ्रष्टाचार नियन्त्रणमा निगरानी गर्ने संस्था भएकोले बिश्वसनियता कायम गर्न आग्रह गरे ।
आयोगका इटहरी प्रमुख प्रकाश पौडेलले स्थानीय विकास निर्माणमा अख्तियार दुरुपयोगको उजुरी अधिकांश आउने गरेको जानकारी दिदै बैकिङ्ग प्रणाली नभएको स्थानमा सरकारी रकमको दुरुपयोग हुने गरेको बताए । आयोगमा आव ०७६/७७ मा दर्ता भएका १०१७ उजुरी मध्ये सवैभन्दा वढी सुनसरी जिल्लाको २३६ रहेको छ भने समग्र रुपमा उजुरी फछर्यौट ४४ दशमलव ३ प्रतिशत रहेको तथ्याङकमा उल्लेख गरिएको छ । यसैगरी क्षेत्रगत निकाय अन्तर्गत सवैभन्दा वढी सङ्घीय मामिला(स्थानीय तह समेत)मा ३० दशमलव ०७ प्रतिशत उजुरी दर्ता भएको छ ।