featured photo: Birat Post

विराटनगर, २९ भदौ ।
रुपन्देहीको गैडहवा गाउँपालिका–६ मा एक दम्पतीले आफ्नै ८ महिने छोराको घाँटी रेटेर हत्या गरेको प्रहरीले दावी गरेको छ । शनिबार बिहान १ बजे बाहिरबाट कोही आएर आफ्नो छोरा सुरजको हत्या गरेको भन्दै श्रीराम मल्लाह र उनकी श्रीमती रेनु मल्लाह चिच्याएका थिए । अनुसन्धानपछि श्रीराम र रेनुले नै आफ्नै छोराको हत्या गरेको देखिएको रुपन्देहीका प्रहरी प्रवक्ता सत्यनारायण थापाले जानकारी दिए ।
‘घरको छतमा गएर आमाले बच्चालाई काखमा लिएको र बाबुले हँसियाले दुईतीनपटक घाँटी काटेको पाइएको छ । छोरालाई मारेर आफू पनि मर्ने उनीहरुको योजना रहेछ । तर छोरा मारिसकेपछि त्यसलाई कपडामा बेरेर कोठामा ल्याएपछि बाहिरबाट कोही आएर हत्या गरी भागेको भन्दै चिच्याएका रहेछन, प्रहरी नायब उपरीक्षक थापाले भने ।
त्यस घरमा श्रीराम आफ्नी आमा, विवाहित जेठी दिदी र उनका दुई छोरासहित बस्दै आएका थिए । घटनाको अघिल्लो दिन श्रीरामकी आमा भानुमती मल्लाहले घर रहेको ११ धुर जग्गा जेठी छोरीको नाममा पास गरिदिएकी थिइन् । आमा भानुमतीको उक्त निर्णयले उनका एकमात्र छोरा श्रीराम र उनकी श्रीमती रेनु खुसी थिएनन् । ‘जग्गा पास भएपछि साँझ घरमा मदिरा सेवनसमेत भएको देखिन्छ’, थापाले भने ।
प्रहरीका अनुसार श्रीमानले अर्की लिएर हिँडेपछि तीन छोरी र एक छोरा हुर्काउने जिम्मा भानुमतीको काँधमा आएको थियो । तर २०६३÷६४ सालमा मात्र उनले नागरिकता बनाएकी थिइन् । त्यतिबेला नागरिकता बनाउँदा उनले आफू विवाहित रहेको, छोराछोरी रहेको बारे केही उल्लेख नगरेको प्रहरीले जनाएको छ ।
‘त्यही कारण छोरा श्रीरामको नागरिकता थिएन । नेपाली केटासँग विवाह गरेपछि जेठी छोरीको चाहीँ नागरिकता बनेको रहेछ । बुहारी रेनुसँग नेपाली नागरिकता भएपनि भानुमतीले उनको नाममा जग्गा पास गर्न डराएको देखिन्छ । यही कारण आमाले आफूहरुप्रति गरेको व्यवहार दुनियाँले देखोस् भनेर छोराको हत्या गर्ने र आफू पनि मर्ने योजना श्रीराम र सुरजले बनाएका रहेछन्,’ प्रहरीले भनेको छ ।

सम्बन्धित

यस वर्षको मनसुन बाहिरिदै,दसैँ घमाइलो हुने सम्भावना

आश्विन शुक्ल पञ्चमी : स्कन्दमाताको पूजा आराधना गरिँदै

भारत सरकारद्वारा आपतकालीन राहत सामग्री हस्तान्तरण

मनसुनी वायुको प्रभाव कायमै,सातै प्रदेशमा पश्चिमी वायुको प्रभाव