featured photo: Birat Post

काठमाडौं,३१ भदौं ।

१२ औं राष्ट्रिय जनगणना यही भदौ ३० गतेबाट शुरु भएको छ । जनगणनाको पहिलो चरण अन्तर्गत घर तथा परिवारको सूचीकरण शुरु भएको हो । नेपाल सरकारले राष्ट्रिय जनगणना–२०७८को कार्यक्रम भदौदेखि मंसीरसम्म सम्पन्न गर्ने निर्णय गत २१ भदौमा गरेको थियो । ‘मेरो गणना, मेरो सहभागिता’ नारासहित ३० भदौदेखि १८ असोजसम्म सूचीकरणको काम शुरु भएको छ । १९६८ सालबाट नेपालमा शुरु भएको जनगणना १२औं पटक २५ कात्तिकदेखि ९ मंसीरसम्ममा हुनेछ ।

यसभन्दा अगाडीका जनगणनामा लैंगिक पहिचान महिला र पुरुष मात्रै थियो भने यसपटक यौनिक अल्पसंख्यकलाई पनि समावेश गरिएको केन्द्रीय तथ्यांक विभागका निर्देशक ढुण्डिराज लामिछानेले जानकारी दिए । घरहरुको संख्या र तिनको प्रयोजनको तथ्यांक समेत यसपटकको जनगणनामा उल्लेख हुने छ । परिवारको कति जनाको बैंकको खाता छ वा ऋण लिएको छ,कृषि क्षेत्रमा लागेका व्यक्तिहरूसँग कुन कुन पालुवा जनावर वा पशुपक्षी पालेका छन् जस्ता अन्य अत्यावश्यक कुराहरु पनि समेटिएको छ ।