बलिङतर्फ, करण केसीले ४ ओभरमा ३६ रन खर्चेर एक विकेट लिए भने मिलिन्द कुमार र एरास्मसले समान २ विकेट लिएका थिए। त्यसअघि टस हारेर पहिले ब्याटिङको निम्तो पाएको काठमाडौं गोर्खाजले निर्धारित २० ओभरमा ८ विकेट गुमाउँदै १५७ रन बनाएको थियो ।काठमाडौंको इनिङ्समा कप्तान करण केसीको विष्फोटक ब्याटिङ मुख्य फिनिसिङ रह्यो । करणले मात्र ११ बलमा ३४ रनको धुँवाधार इनिङ्स खेल्दै टोलीको स्कोरलाई सम्मानजनक अवस्थामा पुर्‍याएका थिए । ओपनर आकाश त्रिपाठीले भने जिम्मेवारीपूर्ण ब्याटिङ गर्दै सर्वाधिक ३२ रन बनाए। उनले ३६ बलको सामना गरे। मध्यक्रममा सन्तोष यादव ले १६ बलमा २६ रनको महत्त्वपूर्ण योगदान दिए।

टिमको सुरुवात भने राम्रो हुन सकेन। बेन चार्ल्सवर्थ र राशिद खान सस्तैमा आउट भएपछि काठमाडौंको ५ विकेट जम्मा ७३ रनमै पतन भएको थियो। त्यसपछि सन्तोष यादव, गेर्हार्ड इरास्मस र करण केसीको उपयोगी इनिङ्सको मद्दतले टोलीले १५० को आँकडा पार गर्न सफल भएको थियो ।

यता लुम्बिनी लायन्सका लागि कप्तान रोहित पौडेल, शेर मल्ल, गुल्बादिन नायब, रुवेनले समान २ विकेट लिए। चार खेल खेलिसकेको काठमाडौँले उद्घाटन खेलमा साविक विजेता जनकपुर बोल्ट्सलाई ५ विकेटले हराउँदै विजयी सुरुवात गरेको थियो । त्यसपछि सुदूरपश्चिमसँग २९ रनले हारेको काठमाण्डुले तेस्रो खेलमा विराटनगरसँग पाँच विकेटको पराजय सामना गरेको थियो । काठमाडौं दोस्रो जितपछि ४ अंक जोडेर तेस्रो स्थानमा छ ।

यता लुम्बिनीको भने यो लगातार दोस्रो हार हो । पहिलो खेलमा चितवन राइनोजलाई हराएको लुम्बिनी दोस्रो खेलमा कर्णाली याक्ससँग पराजित भएको थियो ।