featured photo: Birat Post

विराटनगर,७ फाल्गुन ।
नृत्य गर्दै विराटनगरमा सरसफाइ गरिएको छ । सायद यो अनौठो र पहिलो पनि हुनुपर्दछ । ७३ औं राष्ट्रिय प्रजातन्त्र दिवसका अवसरमा आइतबार यस्तो कार्यक्रम आयोजना गरिएको हो । नाचगानसहित सरसफाई गर्दा स्थानीयको ध्यानकर्षण हुने र उनीहरुसमेत आफ्नो घर, पसल र कार्यालय अगाडि सफा गर्न जागरुक हुने अपेक्षा गरिएको छ ।

विराटनगरलाई सफा, सुन्दर र व्यवस्थित बनाउन भन्दै महानगरपालिकाले काम गरिरहेको छ । महानगरवासीलाई सरसफाईप्रति जागरुक बनाउन महानगरले नाचगानसहित सरसफाई गरेको हो । कार्यक्रममा आदर्श माविका विद्यार्थी तथा शिक्षक, सफाई अभियानकर्मी मुकुन्द बस्नेत, महानगरका कर्मचारी, सरसफाई साझेदार संस्थाका प्रतिनिधिलगायतले सडक सफा गर्दै स्थानीयको ध्यानाकर्षण गराउन विभिन्न गीतमा नृत्यसमेत प्रस्तुत गरेका थिए ।

आदर्श उच्च माविका विद्यार्थी, सरसफाई अभियानकर्मीको सहभागितामा पानीटंकीदेखि ट्राफिक चोकसम्म सफाई गरिएको महानगरको सरसफाई शाखा प्रमुख पुनम दाहालले जानकारी दिए । नाचगानसहित सरसफाई गर्दा स्थानीयको ध्यानकर्षण हुने र उनीहरुसमेत आफ्नो घर, पसल र कार्यालय अगाडि सफा गर्न जागरुक हुने दाहालले बताए ।