अमेरिकाका लागि ओपनर स्मित पटेलले उत्कृष्ट प्रदर्शन गर्दै १०० बलमा ९ चौकाको मद्दतले सर्वाधिक ७५ रन बनाए। उनी करण केसीको बलमा सोमपाल कामीको हातबाट रन आउट भएका थिए । यस्तै, साइतेजा मुक्कमल्लाले पनि ५८ बलमा ३ चौकासहित ४२ रनको योगदान दिएका थिए। उनीहरुले ९५ रनको साझेदारी गरेका थिए ।

त्यस्तै, मिलिन्द कुमारले आक्रामक इनिङ खेल्दै ५० बलमा ६ चौका र २ छक्का प्रहार गरी अविजित ७० रन जोडे। नेपालका लागि लेग स्पिनर सन्दीप लामिछानेले १० ओभरमा ५६ रन खर्चेर सर्वाधिक २ विकेट लिए। यसबाहेक, सोमपाल कामी, आरिफ शेख र दीपेन्द्र सिंह ऐरीले १/१ विकेट हात पारेका थिए।

यस जितसँगै अमेरिकाले लिग-२ मा आफ्नो स्थिति बलियो बनाएको छ भने नेपाललाई अर्को हारले दबाब थपेको छ। नेपाल चार सिरिजमा १७ खेल खेलेर १२ अङ्कका साथ सातौँ स्थानमा छ । अमेरिका २१ खेलमा ३० अङ्कका साथ दोस्रो स्थानमा छ । लिग–२ मा सहभागी आठ राष्ट्रले कूल नौ सिरिजमा जम्मा ३६ खेल खेल्नेछन् । प्रत्येक राष्ट्रले घरेलु मैदानमा तीन सिरिज खेल्नेछन् भने ६ सिरिज अन्य राष्ट्रका मैदानमा खेल्नेछन् । प्रतियोगितामा शीर्ष चारमा रहने टोली सोझै सन् २०२७ मा हुने एकदिवसीय विश्वकपको छनोटमा सहभागी हुनेछन् ।